الجزء الاول
توفي الامام عَلِي في الكوفة وسط أنصاره
و كان بعض جيشه بقيادة جارية بن قُدامة
لسه في أطراف الحجاز بيحاول يطرد
رجال معاوية من اليمن و مكة و المدينة
و لما عرف ان عَلِي مات
اخد البيعة للي ييجي بعده
و بايع البعض تحت السيف
بدون معرفة الخليفة الي بيبايعوه
المهم انه بمجرد موت عَلِي
بايع أهل الشام معاوية رسمياً بالخلافة
و اصبح بحكم الواقع
يحكم الشام و مصر
و الحجاز و اليمن حالهم متنازع عليه
و تحت يده من الجيوش القوية
اكثر بكثير من الي تبقي في الكوفة
أهل الكوفة
بايعوا ابن الامام عَلِي الأكبر
"الحَسَن"
و ده في رأيي
وراثة للمنصب و المُلك
مفيش مرشحين تانيين
و مفيش تعدد آراء
و حتي مفيش نقاش
الي يعترض ياخد علي دماغه
زي ما جارية عمل كده
بس عند الشيعة هو حاجة كويسة
بل أصل من أصول الدين
اسمه الإمامة
فبينما الخلافة عند السنة
تكون في القرشيين
فإلامامة عند الشيعة
تكون بس في ابناء و احفاد الامام علي
حاجة ديمقراطية جداً زي مانتوا شايفين
،،،،،
الحَسَن مكنش متحمس
للخلافة دي اصلاً
و كان من مُحِبي عُثْمٓانْ
و المدافعين القلائل عنه ساعة الحصار
زي ما شفنا قبل كده
بل و بكي عليه بشدة
حتي انه لما الامام علي
قاله في مرة يحسن الوضوء
قام رد عليه بان رجالته قتلوا رجلا
كان يحسن الوضؤ
و كان ينصح لوالده باعتزال الامر ده
و البعد عن الفتنة و الدماء
و كان من الكارهين بشده
بل و اللاعنين
ل محمد بن ابي بكر
ربيب والده
و مساعده المخلص المتحمس
و ده تقريبا لدوره في حصار عثمان
،،،،
دعا قيس بن سعد بن عبادة
لخلافة الحَسَن
الي وافق بعد ما
اخد اليمين علي الي بيبايعوه
انهم يطيعوه مالم يعص الله
وافقوا
اخد الجيش الي كان ابوه بيعده
لغزو الشام قبل ما يموت
و اتحرك بيه
و معاه قائدين كبيرين
قيس بن سعد بن عبادة
و عبيد الله بن العباس
و في الطريق
تسامع الجيش
بأخبار نية الحَسَن
في السلام و إنهاء الحرب
فالناس اتجننت
و اقتحموا الخيمة بتاعته
و طردوه
و مش بس كده
واحد من شيعته ضربه بالسيف
بس مماتش و اعتزل الناس
في المدائن قرب بغداد الحالية
و قعد يتعافى من إصابته
و هنا بقي عُبيد الله بن العباس
قال مبدهاش
اذا كان فيه صُلح
يبقي اطلع بمصلحة
و بعت لمعاوية يفاوضه
علي تمن انضمامه ليه
و اتفقوا و قبض الفلوس
حوالي خمسمائة الف
طبعا غير الأمان ليه و لأصحابه
طيب و دم أولاده الصغار
الي قتلهم بُسر بن أرطأة ؟؟
تقريبا اعتبر جزء من المبلغ
الدية بتاعتهم
يا روح ما بعدك روح،،
،،،،
و بقي فقط قيس بن سعد بن عبادة
علي ما تبقي من الجيش
الي بقي كل ليلة جزء منه يتسلل
و ينضم لمعسكر معاوية
في نفس الوقت كان فيه اشراف من العراق
بيراسلوا معاوية سرا
او يروحوا ينضموا له جهراً
و هنا راسل الحَسَن معاوية
في الصلح
علي ان معاوية يبقي الخليفة
و انه من بعده الحَسَن يبقي الخليفة
و فلوس كويسة للحسن
ييجي خمسة مليون
و تكون ولايتين ناحية شمال العراق
تبعه كأنه ملك عليهم
و فلوسهم و أمرهم ليه
و العفو لكل الناس بلا شرط
و قبل الداهية معاوية
و دخل البصرة و الكوفة و عن يمينه الحَسَن
و بايع باقي الناس معاوية
حتي قيس بن سعد بن عبادة نفسه
ثم ودع الحَسَن الناس كلهم
و ارتحل للمدينة معتزلا الامر كله،،
ولما لامه بعض أهل المدينة
كما لامه بعض أهل العراق
قال لهم
انه كره ان يلقي الله و في ذمته
دماء آلاف المسلمين
لا يدرون فيما قتلوا،،،
و اشترط معاوية علي الناس ان يبايعوه
شخصيا و يدا بيد
فبايع الناس جماعات ورا بعض
و بعد ان استقر الامر لمعاوية
بين سياسته الحربية
و أمور الجهاد و الغنائم و الحرب
الغزوات هـ ترجع تاني
و ان الناس هـ تطلع
تقعد علي الحدود من ٦ شهور لسنة
يجاهدوا و يحاربوا
و ان أهل العراق
مسئولين أدامه عن حرب الخوارج و منعهم
و هنا بدأ عهد جديد
انتهي عهد الامام الي بينزل الاسواق
و بيصلي الفجر وسط الناس
و بابه مفتوح للعامة و الخاصة
و الناس يسمعوا منه و مهما أحرار
ينفذوا كلامه او يسيبوه و يمشوا
،،،،،،
لان الناس اتبطروا علي النعمة؟
لان الناس متجيش غير بالسك علي دماغها؟
لان الناس عينهم فارغة؟
لان الناس لازم يحسوا بالملوك
ليهم هيبة و منعة و حال مفارق كده؟
لان الناس بطبعهم بيتخانقوا و عمرهم ما يتفقوا؟
لان الناس عايزين الملك الي يأمر و ينهي
اكتر من الامام القدوة
الي بِيخفض لهم جناحه و يسمع لهم بتواضع ؟
يمكن لكل ذلك و أكثر
،،،
بقي هنا كالعادة
التعليق
علي المرويات التنبؤية عن النبي
الاول
" الشهير جداً":
الخلافة ثلاثون سنة ثم تكون مُلكا،،
له أشكال كثيرة
منها وصف المُلك بالرحمة او بالعضوض
و ذكره مُسلم و ابن حنبل و الترمذي
طيب هو مدام الحكاية باينة كده
و الوقت أزف خلاص
و انتهي زمن الخلافة
و حل وقت المُلك،،،،
ليه عَلِي كان تاعب نفسه
حروب و خناقات و هم ما يتلم
ده اول المطيعين لنبي و كلامه
!!!!
خلاص الحكم صفر تووووت
التلاتين سنة خلصت
و بكده دخلنا في المُلك
الفريقين يغيروا الملعب
!!!!
و ليه المسلمين كان
منهم الي رافض السلام
و خلافة معاوية
حتي ان الي ضرب الحَسَن
قاله أشركت كما أشرك أبوك!!!!؟
يا عم انت خلاص جه زمن المُلك الموعود
انت بِ تعترض علي نبؤة النبي ولا ايه؟؟
و ليه معاوية يتعب نفسه
و يفاوض و يدي ده مليون
و ده نص مليون و رسائل طالعة نازلة
!!!
خلاص يا عم زمن المُلك جه
خش علي المسرح
و حيي الجمهور الي مستنيك،،،
طبعا ده غير انه وصف حكم معاوية
و من بعده
ب
" المُلك"
و نفي عنهم الخلافة من أساسه،،
أمال ليه بنقول الخلافة الخلافة
ليه المسلمين مسموهاش المملكة زي النبي ما قال؟؟؟
كل حاجة كانت واضحة بنص الرواية أهه
هو الصحابة و التابعين
مكنش فيهم حد حافظ الرواية دي
و يفكرهم بيها و يفضها سيرة؟؟
طبعا رواية متهافتة و غير منطقية
و ان حققها اصحاب الصِحاح
و قالوا ان سلسلة الرواة مقبولة،،،
سلسلة مين و رواة مين
هو مفيش فكر نقدي خالص عند حد؟؟
تقرا التعليقات علي الرواية دي
تلاقي كلام يفطس من الضحك
و الي يقولك التحقيق العلمي
بيأكد صحة الرواية
!!!!
لا يا شيخ؟؟
العلمي؟؟؟
علمي علمك،،،
طبعا ناهيك
ان مجموع فترة الخلفاء الأربعة ٢٩ سنة
مش تلاتين
من ١١ هجري حتي ٤٠ هجري
لو نبؤة بقي و كده
لازم تبقي مظبوطة و دقيقة
الناس بتموت بعض
و محتاجين يعرفوا هيقفوا أمتي
طبعا دي معدتش علي الفقهاء الأفاضل
الي حبوا يحلوا المشكلة دي
قام قالك ان فترة خلافة الحَسَن
تيجي سنة كده
نضعها عليهم
خلافة مين؟؟،
الْحَسَن ؟
و الله الناس دي ما بتتكسف..
هي فين الخلافة دي؟؟
ده كان فلفصة روح
من جيش عَلِي مش اكتر
و الحَسَن نفسه كان اول الناس
الي عايزة تخلص الحكاية بشكل شيك و لائق
جُم يكحلوها قاموا عموها،،
،،التاني الأقل شهرة:
"
إِنَّ ابْنِي هَذَا سَيِّدٌ ، وَلَعَلَّ اللَّهَ أَنْ يُصْلِحَ بِهِ بَيْنَ فِئَتَيْنِ عَظِيمَتَيْنِ مِنْ المُسْلِمِينَ
"
ده بقي في البخاري،،
و فيه وصف النبي للحَسن
و تنبؤ بأنه هـ يجيب
السلام المفقود بين المسلمين،،
طيب ما هو الحَسَن
لما راح يجيب السلام
الناس كانت هتاكله
هو الناس دي
مش مؤمنة و موحدة برده ولا ايه؟؟
ليه الناس كانت مختلفة قوي كده،،
المفروض انه
خلاص الحَسَن نزل ارض الملعب
و كلنا مستنيين الصُلح في اي وقت ،،،،
ليه بقي الصحابة بيراجعوه في كده
و الحُسَيَن اخوه متضايق و مش بيبايع
و قيس بن سعد باصص في الارض
و قرفان يسلم علي معاوية
هما مش دول صحابة برده
ليه غائب عنهم الحكاية دي؟؟
حاجة محزنة الحقيقة
انك تجد المسلمين غير قادرين
علي التفكير لأنفسهم
و تجدهم ساييبين دماغهم
تسليم مفتاح للفقهاء
و اي حاجة
فيها لخبطة و مش منطقية
تبقي هي الحق و العَلم كله
و الي يقول غير كده
يسمع من الشتائم
من الي قلبك يحبه،،،
ارهاب فكري متجذر ،،،
،،،
المهم
تابعونا،،،،
ليست هناك تعليقات:
إرسال تعليق