الجزء ١٥
توفي معاوية
الرجل الأريب الرهيب
الحليم الرحيم
المحارب و صانع السلام
و ترك المُلك لابنه يزيد
مين يزيد ده؟
امه اسمها ميسون
كانت شاعرة بدوية
من قبيلة كلب،،
و دي قبيلة كبيرة
من زمان كانوا مرابطين
علي حدود الشام الصحراوية
بادية الشام يعني
و كانوا من أنصار معاوية الأقوياء
و أتجوز منهم
عشان يزود الصلة معاهم
و الإخلاص و الثقة بينهم
يزيد و هو طفل
راح مع امه في البادية
كانت زهقت
من الحضر و المدينة
و العطور و الحرير
و جالها اكتئاب
من كُتر البيوت المرصوصة
و الطراوة و الدلع
معاوية وداها عند أهلها
في الصحرا و الخلا
تشم هوا الفجر
و تسمع صياح الذئاب
و تنام ملء جفونها راضية،،
و يزيد أتعلم الفصاحة و الشعر
من البدو الصحراويين اخواله
و بعدين ابوه طلبه في الشام لما كِبِر
عشان يدربه علي الحكم
و يحسسه بالمسئولية و المُلك الي جاي
تقريبا جاله صدمة حضارية
بدوي ساذج بهرته أضواء القصر
دلع و هيصة و ميصة
و الكل بيقوله يا مولاي،،
الولد الطيب الخام ده
لازم دماغه تتلخبط
و كمراهق يافع
وسط كل الإغراءات دي
كان لازم يفلت عياره شوية
حكايات انه كان بيشرب خمر
و كان مقضي وقته
وسط الجواري
و بيسمع الموسيقي
و عنده جنينة حيوانات صغيرة كده
فيها نسناس بيلعب بيه
ممكن تكون حقيقية،،
،،
شرب الخمر كان شئ مكروه صحيح
بس مدام انت مستتر و في بيتك
محدش له حاجة عندك
العقوبة و العار كانت دايماً
علي الي بيطلع علي الناس
سكران طينة
و بيتطوح و يقول أنا جدع
و شرب النبيذ
و ده العنب المعتق كام يوم
بس لسه لم يختمر بشدة
كان موجود و مقبول
عند ناس كتير
حتي ان فيه حديث
ان النبي كان بيشرب النبيذ
بعد كَسر حدته و لذاعته بالماء
و عُمر كان بيشرب
النبيذ كتير برده
و يكسره بالماء،،
و فيه اخبار ان معاوية برده
كان بيشرب النبيذ،،
فموضوع شرب النبيذ
مش مستهجن قوي
مدام بتمسك نفسك و متكترش منه،،
،،،
طبعا الكلام ده صدمة العُمر
لناس كتير جدا
بس دي الحقيقة
و دور بنفسك
،،،،
شرب الخمر القوية بقي
و السَطل و أنا جدع ،،
يمكن يكون يزيد عمله
و هو شاب صغير،،
و لعلها علة لازمته بدرجة او باخري
او حتي بالسُمعة السيئة
،،،.
مسالة بقي سماع الأغاني
و قعدة الأنس و الفرفشة
فدي جزء من ترف القصور
و حاجة مرتبطة بالملل و الرفاهية
الي بيتوفروا في المدن
و الحضارة المتطورة
و كان لازم هتحصل
و بقت بعد كده من الأشياء المعتادة
حتي في المدينة نفسها
و في بيوت احفاد النبي
فقد كانت السيدة
سُكينة بنت الحسين
تدعو المغنيين و الشعراء المشهورين
في بيتها
و يجتمع الناس
ليستمعوا للمطرب الكبير
و حصل مرة ان
من كثرة الناس الي اجتمعوا
ناس طلعت فوق السطوح
و كِتروا جداً
لدرجة ان السقف خدهم و نزل
و المغني الشهير " حنين"
فطس ياعيني
،،.
و اشتُهر بان اهل المدينة
لا يرون في الغناء و الطرب عيبا
حتي ان الامام مالك
قال بان آلة "العود"
و عزفها ليس بحرام
صحيح فيه روايات مشهورة
بتحريم الموسيقي
لكنها كلها ممكن تضعيفها
و الأساس ان كل الأشياء حلال
مدام مفيش تحريم صريح،،
و في المعازف
مفيش حاجة صريحة مؤكدة،،
خليني أقولك
ان تحريم "التصوير"
أقوي في رواياته بكتييير
عن تحريم الموسيقي
بس أيامنا دي
بقي كل المشايخ
حتي السلفيين
ام دقون اتنين متر،،
بيتصوروا و يصوروا
و كوول يا براذر
تشغيل الدماغ في موضوع
" الموسيقي "
هو الي عايز زيت كتير عشان
صَواميل الناس تزيق و تلِف
،،،،،
موضوع الجواري بقي
و الهئ هئ
و المئ مئ
مش نقيصة خالص
بمعايير العصر ده
عبد الله بن عمر
كان في الحكاية دي جامد جدا
و الزبير كان عنده جواري
محدش يعرف اولهم من آخرهم
،،
خلصنا من الشرب
و من الموسيقي
و من الجواري
فاضل جنينة الحيوانات
الي كانت في قصره
و النسناس بتاعه
طبعا دي
كانت عجيبة و غريبة ايامها
ازاي الواحد
يجيب حيوانات يتسلي بيها؟؟
الحيوانات تاكلها او تركبها او تحرسك،،
بس كده ،،
و لغاية دلوقتي طبعا
تربية الpets في البيوت
متلاقيش شيخ يوافق عليها ابدا
مياعة و مياصة و قلة أدب
-روح أكل واحد مسكين يا أستاذ أفيد لك-
ده رده،،
طبعا مفهوم الرد ده
بس متسمعش ابداً نفس الرد
لِواحد عايز يتجوز للمرة العاشرة،،
-مدام عنده مقدرة مفيش مانع-،
،،،،
يعني الموضوع مش موضوع
توجيه الفلوس
لمصلحة المجتمع و لا حاجة،،
هو بس كراهية
لتربية الحيوانات للرفاهية
و شُبهة النجاسة طبعا
بس كده،،،
مش حرام و لا حاجة اكيد يعني
،،،،
ايه المشكلة الخطيرة بقي
الي تخلي اللعب مع النسناس
يخرج يزيد من الدين و تكفره؟؟
،،،،،،،
هي دي المآخذ الاساسية
الي كل الحكايات و الروايات
بتكلم عنها
و اذا كان فيه اعتراض من الأوائل عليها
فمن باب انها حاجات
تضييع الوقت فيها
حاجة غلط و متصحش،،
و تقلل من قيمة الخليفة كده و هيبته،،
و الله يمكن الكلام ده وقتها
كان لسه صحيح
إنما من بعد الوقت ده و طالع
الجواري و المزيكة و تربية الpets
بقت حاجة مشهورة لدرجة ان بغداد
كان فيها أسواق مخصوصة للحاجات دي
للعامة من الناس مش للأغنياء ،،،
ده طبع التحول
من البداوة و الخشونة
للمدينة و الليونة و الطراوة،،،
مش كُفر و فُسوق و لا حاجة
و مش مبرر اطلاقا
لبدء ثورات و حروب و دماء
،،،،
طيب فيه حاجات تانية
يزيد متهم فيها؟
متهم انه كافر بجد،،!!
مش مسلم يعني
و مش مؤمن بربنا
و لا رسالة النبي و لا اي حاجة؟؟؟
و فيه أشعار منسوبة ليه بكده،،!!
دي بقي
وسعت شوية من أعداء الامويين
تشنيع زاد عن حده
ده لو كان ظهر منه
اي شئ من القبيل ده
كان ابوه دفنه بالحياة
قبل اي حد تاني،،
اذا كان ناس كتير
من قريش و العرب قبل الاسلام
كانت بتآمن باالله
و مشكلتها بس مع النبي
انهم معترضين علي كونه الواسطة مع الله
و العبادات زي الصوم والحج
كانت موجودة عندهم في الجاهلية
بصورة قريبة من الي بعد الاسلام،،
ايه الي يخلي يزيد
بعد انتشار الاسلام
و تمكنه من القلوب،
و فضل الاسلام
في مُلكه و ملك ابيه،،
يرتد عن الدين
و يتحول لملحد مودرن كده؟؟
و افتراض ان الحاشية المحيطة
و الصحابة المحيطين
و رجال الدين الملازمين له
سكتوا علي كده ،،
ده افتراض اجده
صعب علي الاستيعاب خالص
،،،،
اعتقد ان الروايات دي
ظهرت بعد الدماء الي أهرقت
و المصايب الي حصلت،،
فتم تصويره كشيطان لعين
انتقاما و تشفيا فيه،،،
،،،،،،
طيب
ايه الحسنات المُدعاة من أنصاره؟؟
الفصاحة و قول الشعر
و دي وراثة من امه تقريبا
الفروسية و الجهاد
منسوب له انه كان قائد الجيش
الي راح يحارب الروم
في القسطنطينية،،
و كان تحت إمرته وقتها
كبار الصحابة و التابعين
و يمكن فيهم
الحسين و ابن الزبير
و كانت له صفات قيادية
و لمحات من قوة الشكيمة
و الجلد وقتها
،،،،
و طبعا كالعادة
روايات عن النبي
ان اول جيش
يغزو القسطنطينية
مغفور لهم
،،،
متفهمش ايه صكوك الغفران دي؟؟
روايات كتير
بتقول الي يعمل ايه
مغفور له،،
الي يروح فين
مسموح له،،
الي يقول ايه
مرفوع عنه،،
،،،،
زي ما يكون فيه
درع مقدس أبدي
هياخده الناس دي،،
لو عملوا حاجة او اتنين بس
في حياتهم
مع ان النبي نفسه
مكنش ضامن حاجة لنفسه
الا اذا كان ملتزما بالصالح
من العمل علي طول،،
من باب اول يبقي
هو المغفور له إطلاقا ،،
لكنه أنكر ذلك كثيرا
و آيات القران
تتوعده احيانا
بالعقاب،،
ان تهاون او تباطأ
او لم يبلغ رسالة و كلمات ربه
الاسلام ضد الواسطة إطلاقا
و غير كده تشوهات من صنع البشر،،
علي فكرة الجزار الي حكينا عنه
بُسر بن ارطأة
كان من قواد الجيش ده
قابل يا سيدي
مغفور له ما تقدم و ما تأخر
مولانا بُسر
تحبوا نعمله مولد بالمرة؟؟
،،،،،
عموما الي بيعظموا من أمر يزيد
شايفين ان اهم حاجة
هي الفتوحات و المعارك
مدام الخليفة ملتزم بيها
و محافظ علي المعارك
السنوية و الفصلية
يبقي قشطات و كفاءة
و الباقي مقدور عليه
و نقدر نضعف او تشتت
اي رأي اخر
،،،،،
من كده
نقدر نفهم
ليه فيه ناس كتير
بتسمي أولادها بكل فخر
" يزيد"
و ناس تانية
متطيقش سيرته
" العن يزيد و لا تزيد"
،،،،
هنقول علي أعماله و إنجازاته
و الأحداث المؤسفة إياها ،،،
تابعونا
ليست هناك تعليقات:
إرسال تعليق