الجزء ١٣
وقفنا عند اشتعال الفتنة و لهيبها في مصر
و شفنا ازاي ان الناس انساقت
ورا دعاوي فساد عثمان و وُلاته من أقاربه
و عرفنا ان الفتنة دي كان لها
الي ولعها من الصحابة
و كانت بتزيد يوم بعد يوم
نروح لتاني ولاية مشتعلة:
الكوفة
بُنيت علي أنقاض
مدينة الحيرة عاصمة الملوك المناذرة
المناذرة دول عرب من اليمن
هاجروا للعراق قبلها بييجي ٥٠٠ سنة
بعد انهيار سد مأرب
و انسياح موجات البشر من اليمن
بحثا عن أرزاقهم في أماكن مشابهة
لبيئة اليمن السعيد الخصيب وقتها
و مع الوقت تغلبوا
علي القبائل العربية الموجودة في المكان ده
و كان الشاه الفارسي
بيصطنع القبائل العربية القوية الي علي حدوده
يحموه من العرب البدو الي زيهم
و يساعدوه في حربه ضد الروم
تحالف مصالح يعني
فيه الفرس الأقوي و الأكثر تحضرا
و العرب التابعين بس
الأكثر صلابة و دراية بالمنطقة
،،،،،،
و الناحية التانية في الشام
كان اولاد عم المناذرة
من اليمنيين الأصل برده
يؤدون نفس الدور بس مع الروم
و كان اسمهم الغساسنة
و عاصمتهم بصري بالشام
و الحقيقة ان جزء كبير
من صراع الروم و الفرس في المنطقة
كان بيعتمد علي
الغساسنة و المناذرة و حلفاءهم
و اغلب صراع العرب المسلمين
بعد كده في المنطقة دي في الفتوحات
كان ضد
الغساسنة و المناذرة دول و حلفاءهم
و بمجرد انهزام حائط الصد ده
في الناحيتين
حصل العكس
تحولت جيوش الغساسنة و المناذرة
و من حالفهم
للقتال في جانب العرب
و بالتاي كان انهيار شاه فارس،،
و تحطم الجناح العربي
لإمبراطورية القسطنطينية
متوالياً و منهمرا كالسيل
لان الإمبراطوريتين
كانوا اساساً بيحتضروا
و تملكت منهم
الصراعات الداخلية في بيوت الملوك
و انتشر الظلم و العسف
و اختفي العدل و الحق
فتفشت الثورات
و انتشرت الاضطرابات الداخلية
هذا علاوة علي الصراعات الدينية
بين فرق المسيحية المختلفة
لدرجة تكفير بعضها و استحلال دماء بعض،،
،،،،،،،،
طيب ايه لازمة المحاضرة دي ؟؟
ابداً
بنعرفك ان الكوفة
ورثت كل مناقب و مثالب
المنطقة المشتعلة دي
او محاسن و مساوئ
الامبراطورية الفارسية
و الثقافة العربية للمناذرة
مع صراعات المسيحيين
اللاهوتية الدينية بتاعة الروم و رعاياهم
،،،،
فبينما وجدنا الحاجة الكويسة:
الخط الكوفي الي انكتب بيه القرآن
و العلم بالطب و الفلك
و الكيمياء و الصناعات موجودا
و الكثير من الأقارب من العرب
ينضمون للجيوش العربية
لدك أسوار فارس
أيضاً وجدنا الخُبث و الحسد
و الميل للصراع
و حب القتال لأهون سبب
و ده موجود أصلا في العرب البدو
فما بالك عندما يختلط بمساوئ المدنية
من كذب و خداع
و غش و نقض للعهد
و حنث يمين
و غياب لدور القبيلة و مكانتها
كرادع لمساوئ البشر
و معيار أخلاقي للشرف و العهد و الكرم
كل بدوي بيخاف علي سمعة قبيلته
و حسبها و نسبها و فخرها
و ده قانونه في صحراؤه
اما ابن المدينة
فما اسهل ان يضرب الضربة و يهرب
و يغش و يكذب و يقتل حتي
بلا خوف من ضياع اي سمعة
او حساب من اي كبار لقبيلته
كل ما عليه هو الهروب من السلطة الحاكمة
و ما اسهل ذلك في بلد مضطربة
ليس يحكمها قانون و نظام قوي ثابت
حُط فوق كل ده بقي تسابق العرب
و تنافسهم في كل شئ
تفهم ليه الكوفة كانت لفترة طويلة
مصدر للصوت العالي و الجعجعة
و الثورات و الفتن
و الأحزاب المتعارضة
،،،،
و طبعا
موطن مهم من مواطن الثورة علي عثمان،،،،،
،،،،،،،
كانت الكوفة بالاضافة لذلك
مركزا هاما لتجييش الجيوش
و الحرب علي بقايا
الامبراطورية الفارسية و ما بعدها
يعني السلاح و المقاتلين
كانوا متوفرين بكثرة
و الخناقات و الضرب علي وِدنه
كمان فيه حتة مهمة برده
شُرب الخمر كان منتشر فيها اكتر من غيرها
ناس كتير لسه علي دينهم الاول
او اتحولوا قريب و لسه بيشربوا
و ده يخليهم يسارعوا برده للخناق
و الضرب علي أهون كلمة
زي أفلام فريد شوقي
لما يدخل بار و يضرب واحد
تلاقي كله بيضرب في كله
طبعا مننساش العلوج
و العبيدو الجواري الي زي الرُز
بحكم ان قضم الامبراطورية المنهارة كان
بيوفر مدد لا ينقطع
لارتال مهولة من البشر
بمختلف أصنافهم
طبعا بعد كل ده واضح ان الناس هنا
طبعهم مختلف خالص
عن مصر مثلا،،
و حتي عن البصرة القريبة
الي كانت في اغلبها
من عرب الحجاز
( غرب الجزيرة، مكة و الطائف و المدينة و ما جاورهم)
بينما الكوفة سكنها عرب نجد
( شرق الجزيرة، البحرين و كِندة و حدود العراق)
و كثير من أهل اليمن
و في هذه الأنساب حوار آخر
،،،،،،
المهم
تولي عثمان الخلافة
و علي الكوفة أميرها القدير
سعد بن ابي وقاص
فاتح العراق و القائد الهمام
و معه علي ضبط أمورها المالية و خراجها
عبد الله بن مسعود
الصحابي الجليل
حافظ القرآن و فقيه الأمة
و صاحب مصحف
تفرد بترتيبه بناء علي ملازمته للرسول
هل تتخيل ان الصحابيين الجليلين دول يختلفوا ؟
نعم اختلفوا
و رفعوا امر خلافهم لعثمان
و قيل ان سبب الخلاف
قرض من بيت المال تأخر سعد في رده؟؟؟
فأغلظ له ابن مسعود القول!!!!
الي بيقول كده عايز يقول ان سعد
كان بيتعامل في بيت المال
كأنه مؤتمن عليه بلا رقيب
و أتضايق ان ابن مسعود
يطالبه بيه كأنه هياكل الفلوس يعني
برده الفلوس مشكلة المشاكل،،،،،
و فيه رواية ان أهل الكوفة اشتكوا سعد
و انه مبيعرفش يصلي!!!!
و انه مبيعدلش بين الناس؟؟؟؟
أهل الكوفة زي ما شفنا
فيهم الكثير من اصحاب الفتن
المهم ان عثمان عزل سعداً
و عين الوليد بن عقبة
اخو عثمان لامه
و الياً علي الكوفة
خد بالك بقي ان ابن مسعود كان عامل
بيرعي غنم
عند عقبة ابن ابي معيط
ابو الوليد الي بنتكلم عليه ده
واضح زي ما نقلنا قبل كده
ان عقبة ده
كان راجل باشا و
بتاع معارف و صحبة
و واضح انه مال شوية للإسلام
و ان مات علي الكفر
و كمان واضح ان ابن مسعود
كان بيعزه و معندوش حقد عليه
لانه موردش اي خلاف
بين ابن مسعود و الوليد بن عقبة
رغم ان ناس كتيير
أتكلموا بالسؤ عن الوليد ده
فما بالك بمن يقدر علي
ان ينخز بعصا: أبوك كان و كان،،،،
و هي عصا طالما استُخدمت
بالعكس قال اننا
لسنا مأمورين بالتجسس علي الناس
واضح ان عثمان كان عارف ان فيه ارتياح
بين ابن مسعود و الوليد بن عقبة
و الوليد زي ما قلنا
كان شاب كووول جداً
و أنيق و كريم و حبوب
و يمكن ابن حظ و نكتة
و كان له في الحرب
و قيادة الجيوش بنجاح
و الرعية و العامة كانوا بيحبوه
بس برده
كان مُسرف
و كان بيشرب الخمر علي الملأ
و مرة شرب الخمر و هو بيقود الجيش
و مرة كان مسطول و هو بيصلي
طبعا أهل الكوفة
الي معجبهمش سعد
-و اعتقد لانه كان
قُرٓشي و اغلب العرب في الكوفة
من اليمن و من قبائل نجد" آل ربيعة"-
و الي بيتلككوا لأي حد
فما بالك بمن هو
من الأرستقراطية القرشية القديمة؟
الي كانوا بيكرهوها الصراحة،،
هما فاهمين ان الناس
زي بعض في الاسلام
و المساواة التامة و الكلام ده
بس في الواقع الدنيا مش كده
و اعتبارات النسب القرشي
لها مقام قبلي كبير زي ما وضحنا قبل كده
،،،،،
فما بالكم اما يجيلهم قُرشي مسطول
و ابوه من الكفار؟؟
اكيد الغضب و التلكيك اكتر بكتير
الغريب بقي ان الفقهاء من السنة
بيلتمسوا العذر للوليد
يمكن شربها و هو شايفها مش مُسكِرة!!!،،؟
يمكن اتزنق و عطش في الحرب!!!!؟؟؟؟
اكيد شربها بس عارف انها غلط؟؟؟؟؟؟؟؟
لازم عنده عذر و احنا منعرفوش يا جماعة؟؟؟؟ !!!!
آه و طبعاً الحجة الأبدية:
كل ده كدب و افترا
علي الراجل المجاهد الناجح ده،،،،،
،،
،،،،
ناس لارچ خالص الفقهاء دول
مدام الي بيشرب هو الوليد،،
تشوفهم و هما بيستحلوا دم الهرمزان
و بنت ابو لؤلؤة و كل العلوج،،
تلاقيهم وحوش
إنما الوليد بيصلي سكران
تلاقيهم أمهات حنونات
بتقرص من الوِدن بالراحة
،،،،،،
المهم ان عثمان في النهاية
تكاثرت عليه الشهود و الحجج،،
و جاءه شهود عدول
و أقاموا الحجة علي الوليد
و لم يستطع إنكارها
فأقام عليه عقوبة شرب الخمر
،،،،،
و هي علي فكرة مش
" حد" بالمعني القطعي
لانه مختلف فيمن يُعاقٓب بها
أمتي و ازاي
و ايه صفته لو شرب و لم يُسكِر
او اشتُبه في شُربه
و لم تثبُت و كيف تثبُت
،،،،،
و عموما الرسول
كان بيضرب الي بيسكٓر اساساً
و كان بيضربه
بحاجة زي الخُف عشرين ضربة خفيفة،،،،،
عقوبة تحقيرية مش مقصود بها الاذي
و لما الناس فضلت تِسكر بعد كده
و لم يرتدعوا
زاد ابو بكر و عمر وعٓلي
العدد لأربعين و ستين
و أصبحت بعصا تجلد و تؤذي
و سعد بن ابي وقاص
عفا عن ابو دجانة
الفارس الشهير السكير
بعد ما ابلي البلاء الحسن
في معركة القادسية
بعد ما زوجة سعد
خرجته من الحبس الي كان فيه لسُكره
لما لقيته بيعيط و عايز يلحق بالمعركة
لو هو "حد"
زي قتل القاتل او جلد القاذف
لما تنازل عنه احد او غيره احد
،،،،،،،،,,,,,
المهم ان أصحابنا إياهم
الي بيدافعوا وخلاص
برده مسكتوش،،
قال ايه
عثمان مكنش مقتنع ان الوليد شرب
فقال للوليد المظلوم يا عيني
نعاقبك و أمرنا لله
و الكذابين المفتريين منهم لله
استحمل يا بني ،،،
،،،،،،
ده الخليفة الي بيحكم بين الناس؟؟
بيقضي قضاء هو مش راضي عنه
او حاسس انه ظلم!!!!
,,,,,,,,
فين ده من الخليفة عمر
الي كان يجليه الحرامي
الي سرق حاجة هايفة
و باين انه غلبان
يقوله هل سرقت؟
و يغششه الإجابة : قل لا
و اما يقول : لا
يطلق سراحه
،،،،،
فين ده من عثمان نفسه
لما جت البنت الخدامة
متهمة انها واحد مارس معها الزني
فلما سألوها: ايه الي حصل؟
قالت لهم:
الواد فلان
و بخمس قروش
ورا مصنع الكراسي " طبعا مش كده بالظبط"
قاموا اتلخبطوا يعملوا ايه
قام عثمان قالهم دي بنت هبلة
يا بنت انتي لو قلتي كده
هنعمل فيكي و نسوي كذا و كيت
قولي حصل ايه بقي؟؟
قالت لهم و لا حصل حاجة
و لا اعرفه اصلاً،،،
و سابوها تمشي
،،،،،،،
واضح اننا لو حبينا نصدق المبرراتية
في الحكاية الاخيرة دي
يبقي اما عثمان كِبِر و خرف
او بقي مكسور و عليه ذِلة
و دي حكاية الدبة الهبلة
الي قتلت صاحبها عشان تهش الدبانة
،،،،،،،
المهم ان الوليد تم عزله
و عين مكانه
سعيد بن العاص
و تلك قصة اخري
تابعونا،،،،،
ليست هناك تعليقات:
إرسال تعليق