الجزء التاسع
((كان عقبة بن أبي معيط
من وجهاء قريش وكان خليلا
لأمية بن خلف الجمحي,
وكان عقبة يجالس النبي
صلى الله عليه وسلم,
بمكة لا يؤذيه،
وكان رجلاً حليماً،
وكان بقية قريش إذا جلسوا معه آذوه،
وكان قد صنع وليمة فدعا إليها قريشا,
ودعا رسول الله صلى الله عليه وسلم
فأبى أن يأتيه إلا أن يسلم,
وكره عقبة أن يتأخر عن طعامه
من أشراف قريش أحد
فأسلم ونطق بالشهادتين,
فأتاه رسول الله صلى الله عليه و أكل ،،
ثم عاتبه أمية بن خلف
علي ذلك و طلب منه
ان يبصق في وجه محمد
و يشتمه في مجلسه ففعل،،
،،،
وقد قتل رسول الله
عقبة بن أبي معيط
بعد وقعة بدر من بين الأسرى
صبرا بين يديه،
فقال مستعطفاً النبي:
يا محمد من للصبية؟
فقال: «لهم النار»))
البداية و النهاية لابن كثير
،،،،،،،،،
نكمل كلامنا عن ولاة عثمان
الي جابوله وجع الدماغ
و اتهامات التفريط
الوليد بن عقبة بن ابي معيط
هو ابن الراجل الي أتقتل فوق ده
لو صدقنا قصة ابن كثير المذكورة دي
- و أنا مش مصدقها الحقيقة-
يبقي النبي كان بيدعو بالنار
لتكون مصير الوليد ابن عقبة بتاعنا ده
و ده شئ بغيض و لا يتماشي مطلقا مع دين السماحة و المغفرة
بس طبعاً فيه ناس بتدافع جداً
عن روايات زي دي،،
و تقول آه حصل
و يجيب لها ميت تخريجة
و تفسير و معني كلهم مش زي بعض،،،
فيه كمان حكاية تانية عن الوليد
انه جه مع اخوه للمدينة عشان
يسترجعوا أختهم الي هاجرت للمدينة مُسلمة
و النبي رفض ذلك
بعد نزول الآيات الي تمنع ده
و اعتبر السيدات لا ينطبق عليهن
شروط معاهدة صلح الحديبية
لأنهن غير قادرات
علي الحياة في الصحراء وحدهن
زي غيرهم من الرجال
الي النبي أخرجهم من المدينة
لما أتوه مسلمين من مكة
تطبيقا للمعاهدة
فيه حكاية تالتة
بعد الاسلام
اخرج يجيب فلوس الزكاة للرسول من قبيلة
و بعدين رجع من غير ما يجيب حاجة و قال
ان القبيلة دي كفرت
و انهم حاولوا يموتوه
"
و طلع ان الكلام ده كدب
و محصلش منه اي شئ
و نزلت فيه الآية الي بتقول
" يا أيها الذين آمنوا
ان جاءكم فاسق بنبأ فتبينوا"
من أشهر آيات القران
و فيه كمان حكايات
و روايات عن شربه الخمر
و تباهيه بذلك علي الملأ
بل و دخوله الصلاة سكراناً
مصائب سوده يعني
راجل شُبهة
بص بقي يا سيدي
العكس خالص،،
فيه ناس اثبتوا
انه مش هو الي راح يجيب اخته من المدينة
و كان اصغر من انه يسافر
كل المسافة دي وقتها،،
و انه مش هو الي نزلت فيه
آية الفاسق الكذاب،،،
و انه عمره ما شرب الخمرة
و لا حد شافه بيشربها،،،
و ان الي قالوا عليه كده
ناس موتورة عشان
كان قبض علي اهلهم و عاقبهم،،،
و ان عمر بن الخطاب
ائتمنه علي انه يكون عامل علي الزكاة،،،،
مش بس كده
ده كان كريم و جواد
و محبوب من العامة و البسطاء،،
و كان بابه مفتوح لأي حد ،،
و أنجز و بني و
عمل إصلاحات ادارية كبيرة،،
ولو علي الفتوحات بقي
و الفلوس الي جابها،،
فدي ملهاش اخر
و كان بيقود الجيوش
و ينظم إرسالها و تموينها،،
شخصيتين مختلفتين خالص
مش كده؟؟
هو ده تاريخنا الاسلامي
ممكن اي حد
يطلع باشا
او ابن كلب
المهم مين بيتكلم عنه
و مين بيحبه او بيكرهه،،
بس نقدر نستنتج حاجات برده
هو مكانش متدين قوي،
و ممكن يكون شرب خمر فعلا،
و مش مهم راح يجيب
اخته و لا لأ من المدينة،،
بس حكاية انه هو الفاسق المقصود
و بعدين عمر يستأمنه علي الزكاة
دي واسعة شوية
واحدة فيهم كدب اكيد،،
أظنها الأولي
لان عثمان برده مكانش
هيولي واحد نزل فيه وصف الفسق
ولاية امر المسلمين،،
و نقدر برده نعرف
انه كان ولد برنس
بتاع حكم و إدارة و حركات
و كان علي علم و دراية
بالإدارة و السياسة،،
و ده مش غريب من واحد من الامويين
هما بيت حكم و سياسة من زمان
،،،،،،،
سعيد بن العاص
ابوه مات يوم بدر مع المشركين
و كان الولد متربي تربية كويسة و عالية
و بعد الفتح اسلم مع أهله
و كان من الفصحاء المفوهين
و قيل انه أتربي في حجر عثمان
و كان من ذوي قرباه الي بيعطف عليهم
و الحقيقة انه كان والي قوي و شجاع
و ذو سيرة حسنة
و غزا و فتح بلادا كثيرة
و مكانش عليه شخصيا مآخذ كتير
غير اصله من مشركي الامويين
و شبهة تعيينه لقرابته لعثمان فقط،،
.......
عبد الله بن عامر بن كُرٓيز
ابن خال عثمان بن عفان
و ابوه يبقي ابن عمة الرسول
اتربي في بيت كريم و نبيل
و نشأ علي الجود و الكرم
كان والي قوي و
شجاع و ناجح و كريم،،
أرسل الجيوش
و وطأ البلدان
و فتح خراسان،،
كان اقل واحد من ولاة عثمان
حصل منه مشاكل مع رعيته،،
او يحتل المركز التاني
في حسن الاداء
بعد معاوية طبعاً ،،،
بس شبهة القرابة
خلته يدخل في الحجج بتاعة
التفريط و تعيين من ليسوا بأهل لها،،
،،،،،..،
زي مانتوا شايفين
اغلب الولاة دول كانوا
ناجحين جداً كحكام
و مكنش فيه شبهات ضعف
او غفلة او ظلم حتي عليهم
يعني اختيار عثمان ليهم
كان ناجح علي المستوي الاداري
بس بقي مستوي
الغضب الجماهيري
حاجة تانية،،
هنشوف في الي جاي
حكاياتهم مع إماراتهم
و ازاي الفتنة كبرت شوية شوية
تابعونا،،،،ً
ليست هناك تعليقات:
إرسال تعليق