درهم من عهد الوليد بن عبد الملك
لاحظ غياب "صورة" الخليفة
التي كانت موجودة علي العملة
في عهد والده عبد الملك بن مروان
الجزء الأول
تولي الخليفة الجديد
الوليد بن عبد الملك بن مروان بن الحكم
بعد والده الإمبراطور العظيم
عبد الملك بن مروان
ليصبح الخليفة "الأموي" السادس
و الخليفة "المرواني "الثالث"
،،
فوجد ملكاً موطد الأركان
و أعداء مهزومين أذلهم الزمان
و مجداً و عِزاً لا يطاوله النسيان
و خيرات يعجز عن وصفها اللسان
و مساعدين مخلصين له دوناً عن أي إنسان
،،
و كان هو شخصياً
ليس بعظيم القدر في الفقه،
و ليس بالعقل الجبار تكتيكياً،
و ليس بالمُنظر القائد جماهيرياً،
و ليس حتي بالعارف بلغة قومه،
كان متدلع و تربيته مايصة
و مكنش بيدرس او يذاكر كويس!!
و كان الولد البكر لأبوه
فصِعب عليه و سابه في حاله!!
كان راجل قريب
من صورة الخليفة النمطية
الي بتشوفه في الأفلام الأجنبي!!
ليل نهار قاعد وسط الحريم،،
و بِيصرفوا من فلوس
عمرها ما تخلص
حتي لو غرفها ب مجرفة
و رماها في الهوا!!
،،
بس
في نفس الوقت كان عاقل
و عارف قدراته و مقامه
و عارف انه احسن حاجة يعملها،،
يسيب الماكينة الممتازة
الي ابوه سابها له
و هي تروس الامبراطورية المترامية
تشتغل زي ما هي،،،
يسيب العيش لخبازه يعني،،
،،،
استمر معه نفس رجال والده:
الحجاج و رجاله،،
و دول كانوا كرباج كبير
علي شرق الامبراطورية كله
و حكاياتهم طويلة معانا
،،
اخوه من أبوه: مَسْلَمة بن عبد الملك،،
و ده كان أقوي و اشجع
و اعلم ابناء عبد الملك بن مروان
و لو كانت الامور بال أفضلية
كان هو الأولي بالرئاسة،،
بس أمه كانت عبدة و جارية
و في أيام الخلافة الأولي دي
كان لسه العرب يأنفوا من العبيد
و يعتبروا الخِلفة منهم مش أصيلة،،،
هجين يعني،،
و ده الي حرم مَسلمة من الحكم
و حرم الدولة الأموية
من تكرار النسخة المنقحة
من الأب عبد الملك بن مروان،،،
،،
عمه محمد بن مروان،،
و ده كان قائد كبير
و حكم نواحي شمال العراق
و ارمينيا و شمال ايران
و دي منطقة فيها خيرات وفيرة
و عِز و هنا لا ينقطعان
،،
موسي بن نصير و أولاده و رجاله،،
و ده كان داهية حربي و دبلوماسي
من سلالة عمرو بن العاص و المُهلب كده
يعرف امتي يضرب
و امتي يهرب
و امتي يلعب
و امتي يكهرب الي قدامه،،،
و له معنا حكايات طبعا ،،
،،
كل العظام دول
كانوا يخدمون الوليد
كما خدموا أبوه
مخلصين مجاهدين
مدافعين عن ملكه و ماله،،
و أشدهم في ذلك الحجاج نفسه،،
،،،،
كان الوليد يتفنن في البناء و العمران،،
فلوس كتير و أراضي كتير
و سلام و أمان متناهي،،
يبقي التشييد و الهندسة
هي انسب الحاجات
الي اي حاكم قوي
يحب يعملها لتخليد ذكره و أثره،،،
بني جامع دمشق الاكبر،
و أتم بناء قبة الصخرة،
و وسع مسجد النبي في المدينة،
و كانت الفترة فترة نهضة معمارية كبيرة
حتي ان الحجاج وزيره
بني مدينة جديدة ثالثة في العراق،
بناها من الصِفر De novo!!
مدينة" واسط"
لتكون متوسطة بين البصرة و الكوفة
،،،،
كانت الدولة مستقرة ناعمة
و الأمصار تُغرد في عهده،،
كل الناس " من العرب طبعاً مش العُلوچ"
في أيدهم فلوس تكفيهم و زيادة!!
و تقريباً مكنش فيه فقراء بين العرب،،
علي الاقل في الشام،،
لدرجة انه مرة خرج من القصر
و شاف واحد غلبان شحات
قاعد علي الارض!!
قام استغرب و جابه و سأله
انت ليه غلبان كده؟!!
مش فيه فلوس بتاخدها من بيت المال
تغنيك انت و عيالك؟؟!!!
و اتضح ان الراجل
واخد الحكاية زُهد و اقتناع
بزوال الدنيا و زيفها،،،
،،،،
الوليد بن عبد الملك
هو اعلي مثال ممكن
للخلفاء الي تلوه كلهم تقريبا
باستثناء واحد او اتنين،،
راجل محاط بالحريم و الجواري و المُزَز!
و يخلف اكتر من عشر عيال!!
- الوليد أنجب ١٩ ذكر غير البنات،
و كان له ابن منهم اسمه عُمر
أنجب ٦٠ من الذكور غير البنات-
و يتجوز من كل القبائل القوية
و الأنساب السامية
و يحاول مصاهرة أعداؤه الاقوياء،،،،
،،
الوليد تزوج حفيدة كسري ملك فارس
و ولدت له ولدين توليا الخلافة بعده!!؟
،،،
و تزوج نَِفيسَة بنت زَيد بن الحَسَن بن عَلِي
حفيدة الحَسَن شخصياً!!!!
و كان الوليد
بيحب حماه " زَيْد" ده و يوقره جداً
و كل اما زَيد كان يزوره
الوليد كان يقعده جنبه
و يأمر له ب زكايب من الذهب،،،،
و البنت المسكينة نَفيسة دي
ماتت و هي حامل من الوليد،،،،
ابنها الي مات جَنِين ده
كان ممكن
يحل مشاكل المسلمين
لو كان اتولد و كِبِر و تولي العرش!!!!
كنا خلصنا من وجع الدماغ و الدماء
الي استمرت في الانهمار لقرون قادمة،،،،
فيه بعض الروايات
بتقول ان نفيسة دي
هي " السيدة نفيسة"
صاحبة المقام الشهير في مصر؟؟؟!!!
بس ده مش موضوعنا
،،،،
كمان اتجوز
فاطمة بنت عبد الله بن مطيع
و أبوها هو
عبد الله بن مطيع العدوي!!!
ابن عم عُمر بن الخطاب من بعيد
و أحد قادة ثورة المدينة
علي الخليفة يزيد
و الي قُتِلَ في موقعة الحرة الي حكيناها!!!
رغم الدماء الي بين العائلتين
قدروا يلاقوا مزاج و أمان
يتجوزوا من بعض،،،،
،،،
المثالين دول
نفيسة بنت زيد
و فاطمة بنت عبدالله بن مطيع،،
بيوضحوا مقدار التسامح
و الرغبة في الهدؤ
الي سيطرت علي الناس
بعد شلال الدماء،
الي كان مستمر
بقاله اكتر من عشرين سنة،،
و بيوضحوا اكتر
مزايا انك تبقي إمبراطور
و تقدر تستخدم الزواج و المصاهرة
لتحقيق السلام و تأكيده،،
،،،،،
بس زوجة الوليد الاساسية
هي بنت عمه
أم البنين بنت عبد العزيز بن مروان
اخت الخليفة الثامن الشهير
"عُمر بن عبد العزيز"
،،،،،،
في مسألة الزواج من الأعداء برده
sleeping with the enemy
فيه مثال تاني شهير في البيت الأموي:
تزوج خالد بن يزيد بن معاوية
العالم الكيميائي العربي الاول
و ولي العهد المخلوع
من قِبل مروان بن الحكم،،
تزوج من رَملة بنت الزبير بن العوام!!؟؟
ايوه بجد،،
اخت عبد الله بن الزبير الي
خلع طاعة ابوه يزيد بن معاوية
و حاربه و قاتله!!
و قاتل دولة الامويين
و كاد ان يفنيها عن آخرها!!
حتي جاء الحجاج
و قتله و صلبه ب مكة!!
كل الدماء دي
لم تمنع خالد انه يحب رَملة
لما شافها في موسم الحِج
و رشق سهم كيوبيد في قلبه،،!!'
مع انهم هما الاتنين
كانوا تجاوزوا
الثلاثين وقتها
و هي اكبر منه
ب عشر سنين علي الاقل!!!!! ،،،
بس واضح ان أمها الكلبية
- العربية الرومانية المخلطة-
كانت مورثاها چينات مُعَمرة،،
فلم يهزمها الزمن بسهولة
و فضلت جميلة و فاتنة!!
خطبها خالد بعد استئذان
الخليفة عبد الملك ،
الي لم يمانع اطلاقاً،،!!!
و وافق أخوتها علي ذلك
رغم ان عبد الملك كان لسه
قاتل أخوها شقيقها مُصعب
من كام سنة،،
الي اعترض بقي و زعل و اتحمق،،
كان الحجاج بن يوسف !!؟؟
بعت ل خالد يقوله،
دي زوجة أعداءنا
و الي شتموا أبوك
و انت أمير
و دول مش من مقامك
و احنا لسه قاتلين
أخواتها الاتنين
من كام سنة،،
ف خالد رد عليه
رد مفحِم و مُفهِم :
""وأما قولكَ: أن ليسوا بأكفاء،
فقاتلك الله يا ابن أم الحجاج،
ما أقل علمك بأنساب قريش،
أيكون العوام كفؤاً لعبد المطلب بزوجه صفية،
ويتزوج رسول الله صلى الله عليه وسلم خديجة بنت خويلد،
ولا تراهُم أكفاء لآل أبي سفيان ؟!
و أما قولكَ: قارعوا أباك على الخلافة،
ورموه بكل قبيحٍ،
فهي قريش يُقارع بعضها بعضاً،
حتى إذا أقر الله عز وجل الحق مقره،
عادت إلى أحلامها وفضلها
وكان تقاطعهم وتراحمهم
على قدر أحلامهم وفضلهم.""
،،،،،،،
يعني من الآخر
احنا قرشيين
أشراف زي بعض
و نتخانق نتخانق؟؟
إنما ساعة الصفا
بنتصالح و نبقي
سمن علي عسل!!!
إيش أخْشَشَك بيننا
انت يا حِشَري يا دون؟؟؟؟
،،،،
صحيح
قريش و أشرافها
و بيتخانقوا و بيتصالحوا
مالكم انتم يا جرابيع؟؟
،،،،
بس محدش بيفهم،،،
،،،،
كنا ذكرنا قبل كده
نظرية ابن خلدون
في الإمبراطوريات
و الأسر الحاكمة،،
و ان الآباء المؤسسين
الي شافوا الذل و البهدلة
بيعملوا أغلب الشغل،،
و يستمر بعدهم أبناءهم
الي شافوا شوية بهدلة صغيرين
فبيحافظوا علي الدولة!!
و ييجي الأحفاد
المايصين المُترفين
فيكونون آخر السلالة الحاكمة
التي لها هيبة و قيمة كبيرة عند الناس
تضمن استمرار العمل في المملكة
بأقل قدر من الخيانة او الانقلابات،،
،،
الوليد بقي
هو اول الأحفاد المُترفين
،،
ابوه عبد الملك كان جيل الآباء
الي شافوا شوية بهدلة علي بسيط،،
هو صحيح ممكن يعتبر
مؤسس لأسرة جديدة،،
بس تربيته و نشأته
مش زي معاوية الاول أكيد
- جيل الأجداد المؤسسين-
الي حفر في الصخر من الصفر،،
عشان يأسس للملك الجديد ده،!!
،،،،
الوليد و إخواته
اولاد عبد الملك،،
جيل الأحفاد ،،
كانوا آخر جيل
حافظ علي الخلافة
و بعدهم انهارت بدداً،،
،،،،
تعالوا بقي نشوف
عمل ايه الوليد
او بمعني أصح
عمل ايه رجال الوليد،،،
تابعونا،،،،
ليست هناك تعليقات:
إرسال تعليق