الجزء التاسع
نستكمل مع عُمر الثاني
الخليفة الاستثنائي،،
خطواته الجبارة
في هدم الامبراطورية!!!
هتقولي بس هو ليه عمره
ما قال ان الخلافة غلط؟
و ان النظام ده باطل ؟،
و انه عايز يهده فعلا؟؟
ببساطة هو قال كده،،
بس بطريقة تانية،،
ساهمت اكتر في تحطيم
أسس الامبراطورية،،
سمي كل أفعال
الخلفاء الامويين السابقين
مظالم و أفعال باطلة !!
و عكسها و لغاها!!
مش بس كده،
ده ابطل كمان
بعض أفعال الخلفاء الراشدين!!!
،،،
شفتم ازاي
جفف منابع الاقتصاد الامبراطوري
و بكده بَيِن ان
اعمال من سبقوه
باطلة و الظلم فيها كبير!!
و زي ما شفنا مع بعض،،
مفيش وسيلة للحكم
في العالم و في التاريخ
ب استخدام النظام الملكي و الامبراطوري،،
إلا و مليئة بِ الضحايا و المشاكل،،
،،،
حتي العهد الذهبي للامبراطورية،
عهد عُمر الاول،،
كان العُلوچ هم عبيد الامبراطورية
وِ نساؤهم مصدر متعة الامبراطورية،
و أموالهم و عرقهم
مصدر" الكاش" في الامبراطورية،
و أولادهم و بناتهم
هم الخدامين و الشغيلة في الامبراطورية ،،
فيه ظُلم أهه!!
و لو حصل لأهلك و ناسك ،
هـ تقوم تِقَطع
المحتل الي بيعمل فيهم كده!!
بس لانه ظلم ل طرف آخر،
ف احنا بنتغاضي عنه و نتناساه،،
،،،،
و بالنسبة لكل الخلفاء التانيين،،
كان برده فيه مظاليم،،
،،
حروب توحيد الدولة
تحت قيادة مكة و المدينة،،
بعد الانقسام الاول و وفاة النبي،،
الحروب المسماة " حروب الردة"،،،
ليست ب أمر إلهي!!
هي في احسن الاحوال
مجرد اجتهاد بشري و
قد يكون صح او غلط،،
ابو بكر استحل استرقاق
نساء و اولاد المهزومين وقتها،،
و عُمر الاول- ابن الخطاب-
شاف ان ده غلط،
و اطلق سراحهم
و رجعهم لأهلهم بعد كده
في وقت ولايته !!
اكيد فيه غلط،
و اكيد فيه ناس اتظلمت!!
،،،،
عثمان و الثورة عليه،،
لا داعي للكلام،،
الحال أغني من البيان،،
،،،،
عَلِي و الحرب الأهلية الأولي،،
رحم الله الإمام،،
فقد قتل و تسبب في قتل
أكبر عدد من الصحابة و المسلمين
منذ بدء الدعوة حتي وقت حكمه،
و كله في سبيل المُلك !!
،،،،
الامبراطورية طول عمرها
وجع دماغ و مظالم
بعضها كبير و بعضها صغير ،،،
،،،
،،،،،
عُمر الثاني - بن عبد العزيز-
كان برده شايف
ان الخليفة ابو بَكر
ظلم السيدة فاطِمة بنت النبي !!
في موضوع منعها من ميراث ابيها
في "فدك"!!!!
و ده حصل وقتها زي ما حكينا
بسبب الحكم و الدولة!!!
و منعاً لإثارة موضوع
استحقاقها و أولادها و زوجها
لميراث النبي كله من المُلك!!
و كنا شرحنا كل ده في كتاب " عَلِي"،،
عُمر الثاني ابطل الفعل الراشِدي ده،
و رجع الارض دي،
لأحفاد الحَسَن !!!
أبطل فعل ابي بكر!!
،،،،
،،،
عُمر الاول - بن الخطاب-بقي
كان فرض المكوس و الجمارك
و الضرائب علي التجار،،
عُمر الثاني أبطل فعله!!
و قال الفلوس دي ظُلم!!!
عُمر الاول كان فرض
علي النصاري و اليهود
يلبسوا ألوان و أشكال هدوم معينة،
ل تمييزهم و معرفتهم من بعيد،
و منعهم يسكنوا جنب المسلمين!!!
عُمر الثاني قال
من حقهم يسكنوا في اي حتة،
و يلبسوا الي عايزينه،
و الناس تزورهم
و تواسيهم و تفرحلهم!!
و ابطل فعل عُمر الاول،،
،،،
عثمان و تقريبه لأقاربه ،،
عُمر الثاني استنكر ده جداً،
و بهدل اقاربه و معارفه معاه،،
عثمان كان يقبل الهدية،،
مهما زادت و كبرت،،
عُمر الثاني اعتبرها رشوة!!
و رفض قبولها اطلاقاً باي شكل،،
،،،،
علي بن ابي طالب
حارب الناس
و سبح في نهر من الدماء،،
في سبيل تثبيت المُلك و الحكم،،
عُمر الثاني
كان مستعد يسيب الموضوع كله
من الاول لو لقي مقاومة كبيرة،،
و ابنه الاكبر
" عبد الملك"
حرضه علي قتال
بني أمية في سبيل أخذ ثرواتهم،،
و ادخالها بيت المال!!!؟؟
و قاله دي حرب مقدسة،
و انت بكده هـ تُحق الحق
و تطبق شرع الله!!؟؟
قام قاله كلمة تعتبر دستور
هدم الامبراطورية من جذورها:
"يا بني لا خير في امر لا يجئ الا بالسيف" !!؟؟؟
فين ده بقي من المجزرة البشرية
الي أقامها الامام عَلِي
في سبيل ما يعتقد انه حقه!!؟؟
أبطل فعل الامام عَلِي
،،،،،
أما عن الخلفاء الامويين بقي،،
فحدث و لا حرج،،
لغي الضرائب الي فرضوها،،
و رجع الفلوس الي غرموها الناس،،
أوقف خالص هدايا الشعراء
و منعهم من الدخول عنده،
أو النفاق و المديح الفارغ له !!
أوقف خالص ديوان الجواري
و الحريم الي كان مخصص للخليفة،،
منع ضرب الناس المشتبه فيهم ،،،
و أوقف قتل المخالفين الخارجين
علي الخليفة مهما شتموه او لعنوه !!!
و في كل المنازعات
بين الامراء و الناس،
كان ب ينصر الناس عليهم
علي طول الخط،،
رجع لأهل الكتاب
كل كنيسة او معبد اتاخد منهم،،
لدرجة انه كاد يهدم
أجزاء من المسجد الأموي الضخم
اللي بناه الوليد بن عبد الملك!!!
لانه كان أدخل فيه بعض الكنائس غَصباً!!
بس في الآخر
طلب من النصاري السماح
و طِيب الخاطِر ،،
بدل هدم المباني الي ملوش لازمة،،،
و الناس وافقت!!
منع أخذ ضرائب
علي نذور و فلوس
المعابد و الكنائس!!
و ده كان مصدر دخل للامبراطورية!!
منع أخذ الخرِاج من اهل الكتاب
الا بعد ما يبقي معاهم
دهب في ايد ستاتهم!
و هدوم حلوة و شيك عند رجالهم!!
و بهائم يركبوها في مشاويرهم!!
و علي الزيادة و الفضل يكون الخِراج ،
و ممنوع ضرب اي واحد
عشان الضرائب،
و اي واحد غلبان
محدش ياخد منه جزية او خراج!!!
طبعاً
لو اتكلمنا عن
الضرب و السحل قبل كده
و بيع الهدوم و بهدلة الناس
وقت جمع المعلوم من خِراج و خلافه،،
فحدث و لا حرج!!!
،،
و لا أقولك ،،
نِجِيب الحرج،،
بيقولك في قبيلة أمازيغية
اسمها " لَواتَة"
كانوا في نواحي ليبيا كده،
و عليهم جزية صُلح الحرب
من ايام الخليفة عثمان،،
قام ايه بعد سنين
افتقروا و مبقوش لاقيين ياكلوا،،
و قالوا لحاكم مصر وقتها:
الصحابي الكبير عمرو بن العاص،،
مش لاقيين فلوس يا أمير!!
طبعاً الراجل قالهم مليش دعوة،
الفلوس تيجي بأي طريقة!!
بيعوا هدومكم ، بيعوا أكلكم ،
بيعوا اي حاجة،،
قالوله مفيش اي حاجة
تجيب فلوس عليها القيمة،،
قالهم خلاص
بيعوا بناتكم الجميلات دول،،
بيعوهم و نأخذهم بدل الفلوس!!!؟؟
تخيل ان الناس دول
فعلا باعوا بناتهم
بدل الجزية اللي عليهم!!
استمر الامر ده سنة و لا اتنين؟؟؟
اطلاقاً ،،
استمر ييجي خمسين سنة!!!
امبراطورية و مجد و عِز بقي،،
لغاية عُمر الثاني ما جه،،
و قال " اللَواتِِيات "
الي عند أي واحد فيكم،
استرقاقهن باطل !!!!
و حاجة من اتنين،
ياتسيبوهم يرجعوا بلادهم ،،
و تدوهم فلوس تعويض
عن سنين الاستمتاع الجنسي بهن!!
يا تروحوا تتجوزوهم من أهلهم
و تدفعوا مهرهم
زي اي واحدة حرة بتتجوزوها!!!
يتجوزوهم ؟؟
يعني الناس دول
بقوا مسلمين كمان؟؟؟؟
نتوقف عن الحفر في الموضوع ده،
لان رائحة عفنة تتصاعد مع عُمق الحفرة،
،،،
طبعا كل المراسم الامبراطورية
و الفخفخة الملكية،،
و الرخام البراق،،
و القصور المذهبة،،
و جلد الغزال الي بيكتبوا عليه،،
و العُطور الي تمنها يِجَوِز بَلد،،
و الخيول المُسَرجة ب سُروج الذهب،،
كل ده اتقفل و اتلغي،،
و بس مرتبات الموظفين،
هي الحاجة الوحيدة الي فضلت،،
،،،،
الشيخ الفقيه
عَدي بن أرطأة
والي البصرة،،
كان هيتجنن من تخريب المملكة ده،،
و مش فاهم ازاي
نجيب فلوس من الناس؟
بدون غَصب،،
او نمسك مجرمين؟
بدون ضَرب،،
و ازاي الجيوش تقعد ؟
بدون سَلب،،
و بعت يراجع عُمر الثاني
اكتر من مرة،،
لحد ما عُمر زَهق منه و قاله:
انا غَرِتني فيك الذقن و الزبيبة!!!
و انت طلعت
أصلك راجل مفتري و آخرتك سؤ!!!
و بعت يعزله من الولاية !!!
،،،
،،،،،
ناس من المشايخ نفسهم
ماستحملوش و اتضايقوا
من عمايل الخليفة الغريبة دي،،
مجدد و متفرد بحق
كان عُمر الثاني ،،
و قلة هم من فهموه فعلا،،
تابعونا،،
ليست هناك تعليقات:
إرسال تعليق