الجُزء ٢٧
نكمل مع البطل التاني
شبيب الشيباني
- من بني شيبان بني بكر بن وائل
يعني بني ربيعة و أهل نجد-
القائد و الخليفة للخوارج الصفرية،،
و الصَفرية دول
نسبة لمؤسس المذهب- ابن صفار-
هم أقل الخوارج
معاداة لعموم" المسلمين"!!
و بيتجوزوا من "المسلمين"!!
و شايفين ان
"كُفر" باقي الناس
الي غيرهم،،
هو كُفر النعمة
يعني جحدها و رفصها،،
مش الكُفر بمعني إنكار الإله
و الخروج من الدين !!!؟؟؟
،،
و شبيب ده كان قائدهم لسنتين
دوخ فيها جيوش العراق،،
و كان بمئة من جنوده
يهزم ألف من جيوش العراق!!!
و هو شخصياً كان اما يزعق
و يشغل الضرب في الاعداء،،
تلاقي الرجالة و الفرسان
بقت زي الفراخ قدام الذئب
كل واحد يرفرف و يجري و يكاكي!!!!
،،،
ابوه كان من فاتحي الشام
و جاب جارية و سبية جميلة طحن،،
بس نمرودة و شرسة
قعدت تضربه و تشد شعره!!!!
و بعدين لان لها
و أظهر حبه و تسليمه،،
و سابها لحالها
قامت ماتت في حبه و عشقه،،
و بقت خدامة التراب
الي تحت رجليه
و كان اسمها العربي - جهيزة-،،
و أنجبت شبيب ده
الي بقي أسطورة
لدرجة انه منسوب لها
انها شافت نور خارج من بطنها
و هي حامل فيه؟؟؟
شبيب بقي
طلع مقاتل و محارب،
فشر "أخيل " اليوناني!!
الي امه الحورية
إدته ذكاء و حَصانة
و ابوه "زيوس" اداله قوة تفوق البشر،،
،،
حارب شبيب
اكثر من عشرين جيشاً
هزمهم كلهم!!!!
و قتل من صناديد العرب و العراق
اسماء رنانة
أشهرهم "عتاب بن ورقاء"
و ده كان قضي علي ثورة الري
ايام مُصعب بن الزبير و حرق البلد
زي ما قلنا زمان،،؟
،،،
طبعاً هتقولي و ايه يعني
ما احنا شبعنا
أسماء ابطال
خارجين علي الدولة ،،
و كلهم أسود و وحوش يعني،،
ابن الحرة،
قطري،
شبيب،
،،،
ايه الفرق؟؟
أقول لك بس ده كان مراته
محاربة أمازونية
اسمها " غزالة"
،،،
طيب ما قطري كان بيحب
" أم حكيم " المقاتلة برده،،
،،،
بس غزالة قصتها مختلفة شوية
و خالدة في التاريخ،،
هي أول ملكة حقيقية
في الاسلام!!!
قبل شجرة الدر
بمئات السنين،،
و تفوقها في انها
كانت مقاتلة بالسيف!!
و خطيبة و فقيهة كبيرة!!
و إنسانة متدينة جداً!!
و طبعاً
جميلة جداً جداً!!!!
ملكة حقيقية كما يجب ان تكون
،،،،
كان الثلاثي الملكي
شبيب و امه جهيزة
و مراته غزالة
بيقودوا الجيش في كل المعارك
و لم يهزموا أبداً
في أي معركة،،،
انسحبوا انسحابات تكتيكية
لان ده كان أسلوبهم
في الكر و الفر
و إرهاق الجيوش الكبيرة
و تشتيتها
و تضييق ارض المعركة عليهم،،
عشان يستفيدوا من
ضخامة حجم جيوش الاعداء دي،
بأنهم ينقضوا عليهم كالصاعقة،
فينكسر التماسك و تعم الفوضي
و يهرسون و يدوسون بعضهم،،
بالاضافة لحرب العصابات
و السلب و النهب،،
و ضرب الأبطال و القادة
علي حين غرة،،
فينفرط حبل الجيش
بعد هلاك قادته،،،
أساليبهم دي خلتهم فعلا
يهزموا الجحافل المؤلفة،
بمئات معدودة،،،
،،،،
طبعا مع الثلاثي الملكي السحري
عائلة شبيب المقاتلة
كان الفوز مضمون و مفهوم،،،
،،،
مثال علي تسامح
الخوارج الصفرية دول،،
انهم كانوا لما يكسبوا
و يبدأ الجيش التاني في الانهيار
كجبل الجليد،،
كان شبيب يوقف الضرب بإشارة منه
و يعفو عن المهزومين،،
بمجرد انهم يبايعوه ك خليفة للمسلمين
حتي و ان لم يقصدوها
او قالوها اتقاء ل سيفه!!!
،،،،
الحجاج كان بيلاقي صعوبة في
انه يجمع الجيوش تطلع تحاربهم،،،
لدرجة انه كان بيهدد الناس بالقتل
ان مطلعوش يحاربوا!!!!
،،،،
بعد الهزيمة العاشرة،،
صحابي كبير من اهل البصرة
و أحد فاتحي فارس
من ييجي ستين سنة!!!؟؟؟
و كان من قادة الجيوش
وقت عُمر بن الخطاب،،
اسمه زُهرة بن الحَوِية
من بني تميم
كان وقتها بقي شيخ عجوز،،،
راح زعق في الحجاج
و قاله انت قرفتنا بالعك ده!!
تبعت الفرق الصغيرة
ألفين ،تلاتة ،ستة آلاف
و شبيب بيهزمهم علي طول،،،
إبعت جيش ضخم مهول
يفعصه هو و جماعته!!!
قام الحجاج قاله بس تطلع معاهم
قاله ماشي اطلع معاهم
و هو تجاوز التسعين وقتها!!!!
المهم الجيش تجاوز عدده
الخمسين ألف!!!
بقيادة القائد
عتاب بن ورقاء الي لسه قائلين عليه ،،
راح يحارب ضد
الف واحد مع شبيب و عائلته،،
و كالعادة شبيب اشتغل عليهم
"سوبر ماريو " مع مراته و أمه،
و بدل قص الحشائش
و قطع الصبار
مع "ماريو"،،
كان شبيب
بيقص الرؤوس
و يقطع الأجساد!!!
و مات طبعاً
الصحابي المجاهد
" زُهرة"
مع القائد "عتاب"
و الجيش بتاعهم
بقي عامل زي
المنخُل بتاع الفرن البلدي،،
مكسر و مخرم
و مليان كلاكيع عجين،،
،،،،،
طبعاً الحجاج رجليه بقت بتلُق،،
هو عمره ما قاد معركة حقيقية
ضد عدو قوي،،
هو مش فارس و لا غضنفر،،
هو مُحلل و طاغية و مُفكر،،،
،،،
في يوم العصرية كده،،
غزالة في قعدة رايقة
مع شبيب جوزها،
قالتله "شيبوبتي"
انا عاوزه اصلي في جامع الكوفة
و أخطب في الناس هناك؟؟؟
قالها يا شيخة بلاش هزار،؟
قالتله بقي كده؟؟
طب شوف بقي:
نَدرٍ عليا
اني لازم اروح الكوفة
و أدخل الجامع وسط النهار!!
و أصلي
و أقرأ
سورة البقرة و آل عمران
في الركعتين
و أخطب في الناس كمان!!
و متقربش مني يا شبيب
لحد ما أوفي النذر ده!!
طبعاً شبيب
خدها و خد الحاجة أمه
و كام واحد من الرجالة
و هجموا علي الكوفة،،،
،،
و الي فضلوا يدافعوا
عنها من الرجال،،
بعد الأغلبية من الحامية ما جريت،،
طبعاً اتثبتوا بسرعة البرق،،
،،،،
الي قرأ فيكم زمان
أستريكس و أوبليكس
و ازاي بيضربوا الرومان،،،
هيقدر يفهم المعركة كانت
حصلت ازاي،،،
،،،،
دخلت "غزالة " الجامع
و صلت مع شبيب و الرفاق جماعة!!!؟؟؟
و قرأت سورة البقرة كاملة في ركعة!!!؟؟
و آل عمران كاملة في ركعة تانية!!!؟؟
و صلت العصر جماعة كمان
و طلعت المنبر و خطبت في الناس!!!؟؟؟
،،،،،
الحجاج كان
مستخبي في قصر الإمارة
و قافله بالحديد،،
شبيب راح علي البوابة
و ضربها ضربة خلتها تنبعج،،
و وقف يشتم الحجاج
يا راجل يا ناقص يا جبان
يا مَرَ، يا خس،س!!
يا عِرة ثقيف
يا ابن الزنا،،،
،،،،،
الحجاج
و لا هو هنا
فضل مستخبي،،
يا روح ما بعدك روح
،،،،
و في ذلك قيلت الأبيات الخالدة:
أسدٌ علَيّ وفي الحروب نعامةٌ
ربداء تجفلُ من صفير الصَّافرِ
هلاّ برزتَ إلى "غزالةَ "في الوغى
بل كان قلبك في جناحي طائرِ
،،،
بتتشطر علينا و عامل دَكر
و انت جريت من "غزالة "
زي النعامة الهبلة،،
كنت اظهر لها و ورينا معدَنَك
بس يا حلو بانت لِبِتَك
،،،،
عجبتها الحكاية
و روحت حكت لصاحباتها
الامازونيات المقاتلات،،
فكلهم راحوا للخليفة شبيب
و صمموا انه يفسحهم زيها
و يروحوا مع بعض المراجيح في الكوفة
و يصلوا زيها في جامع الكوفة الاكبر!!
طبعا شبيب راجل لارچ
و كوول آخر حاجة،،
خد البنات و الستات دول
ييجي مئتي مقاتلة حرورية،،
و طلع بيهم
تاني علي الكوفة،،
و تاني هزموا الحامية
الي وقفت لهم،،
و تاني صلوا في الجامع
و تاني خطبت " غزالة" المُزة في الناس،،
بس المرة دي كان
بدل الرجالة ما كانوا بيحاوطوها،،
كانت الستات المُزَز صاحباتها
شايلين السيوف و الأسهم و القسي،،
و بيجولوا ببصرهم في المُصلين
بحثاً عن نية غدر او تمرد
يخمدنها بسرعة و قسوة،،
،،،،،،،،
،،،،،
فانتازيا تخيلية:
خلصوا الفسحة الجميلة دي
و اشتروا حرنكش من السوق
و غزل البنات للصغيرات،،
و لحقوا قطر تسعة في آخر لحظة
و هما بيغنوا للسواق
و بيطبلوا لبعض
و واحدة منهم بترقص علي السقفة،،
و شبيب قاعد لوحده في اول صف
بيسد ودانه من كُتر الدَوشة،،
!!!!؟؟؟
،،،،،،
أقامت غزالة سوق الضراب
لأهل العراقين شهراً قميطا (كاملاً)
سمت للعراقين في جيشها
فلاقى العراقان منها بطيطا (عجباً)
،،،،،
طبعا المغامرة الخيالية دي
انتهت بكمين قُتلت
فيه غزالة و قطع رأسها،،،،
و الجيش بدأ ينهار
مع الوقت و كثرة المعارك
و شبيب فقد الطاقة
بتاعته بعد موت حبيبته،،،
و في النهاية تم استدعاء
جيش الشام الإمبراطوري،،
بقيادة سفيان بن الأبرد
الي قضي علي قطري قبلها،،
قدر يستهلك
باقي طاقة شبيب و جيشه،،
و يخليهم ينسحبوا و يعبروا النهر
و اثناء عبورهم،
غرق شبيب بحصانه!!!!!
و انتهت الأسطورة
كما تنتهي كل الأساطير،،،،
،،،،،
باقي القصة ان أمه
لم تصدق قصة قتله
بس لما قالولها انه غرق،،
قالت لهم كده اصدق
هو كان نور و خرج مني
و النور ميطفيهوش الا المياه؟؟
!!!!؟؟؟؟
بجد حكاية تنفع تعمل
قصة كوميكس تضرب
"أستريكس و أوبليكس" بالشلوت،،
و لكنكم تحبون الفرنجة،،،
،،،،،
تابعونا،،،،
ليست هناك تعليقات:
إرسال تعليق